پەیامی فێدراسیۆنی ژنانی دیاسپۆرای كوردستانی لە دوازدەیەمین ساڵیادی جینۆسایدی ئێزدییەکاندا
خوشک و دایکە سەربەرزەکانی قوربانیان و جینۆسایدکراوانی
کوردانی ئێزدی...
١٢ ساڵ بەر لە ئێستا و لە ڕۆژی ٣ی ئابی ساڵی ٢٠١٤، یەکێک لە دڕندانەترین
و نامرۆڤانەترین تاوانەکانی سەدەی نوێ دژی پێکهاتەیەکی ڕەسەنی کۆمەڵگاکەمان ئەنجام
درا. لەو ڕۆژە ڕەشەدا، تیرۆریستانی ڕێکخراوی توندڕەوی "داعش" هێرشیان کردە
سەر شاری شنگال و دەوروبەریان. لە ئەنجامی ئەم شاڵاوە دڕندانەیەدا، خەڵکی سڤیل دووچاری
ئاوارەبوون، ماڵوێرانی، کوشتنی بەکۆمەڵ و ڕفاندن بوونەوە.
ئێمە لە فێدراسیۆنی ژنانی دیاسپۆرای كوردستانی،
لە کاتێکدا ئەم یادە خەمناکە بە بەشێک لە مێژووی خوێناویی گەلەکەمان دەزانین، بە ڕێز
و پێزانینێکی قووڵەوە سڵاو بۆ خۆڕاگری، کۆڵنەدان و سەروەریی دایکانی جگەرسووتاو، ژنانی
تێکۆشەر و سەرجەم کەسوکاری قوربانیانی ئەم مەرگەساتە دەنێرین، کە سەرەڕای توندترین
ئازار و نەهامەتی، پارێزگارییان لە ناسنامەی نەتەوەیی و ئاینیی خۆیان کرد.
خوشکە ستەملێکراوەکانمان... داعش لەگەڵ هێرشەکانیدا،
بە ئاشکرا زەبرێکی گەورەی دەروونی و جەستەیی ئاراستەی ژنانی ئێزدی کرد؛ لە ڕێگەی دەستدرێژیی
هەمەچەشن و هەوڵدان بۆ تێکدانی شوناس و دیمۆگرافیای ناوچەکە، کە هەموو ئەم ڕەفتارانە
بە پێی یاسا نێودەوڵەتییەکان دەچنە خانەی تاوانی جینۆساید و تاوانی دژ بە مرۆڤایەتییەوە.
فێدراسیۆنی ژنانی دیاسپۆرای كوردستانی لەم
یادە کارەساتبارەدا، وێڕای دەربڕینی ئامادەیی تەواوی خۆی بۆ پێشکەشکردنی هەر خزمەتێکی
شایستە بە کەسوکاری قوربانیان و کەیسی جینۆسایدی ئێزدییەکان، جەخت لەم خاڵانەی خوارەوە
دەکاتەوە:
داواکاریی بەپەلە دەکەین بۆ دروستکردن و کاراکردنی
دادگایەکی تایبەتمەند لەسەر ئاستی نێودەوڵەتی و نیشتمانی بۆ بەسزاگەیاندنی تاوانبارانی
داعش و دادگاییکردنیان لەسەر ئەو تاوانە گەورانەی دژی ژنان و منداڵانی ئێزدی ئەنجامیان
داوە.
جەختکردنەوە لەسەر پێویستیی خێراکردن لە دۆزینەوە
و ئازادکردنی ئەو ژن و منداڵە ڕفێنراوانەی کە هێشتا چارەنووسیان نادیارە، لەگەڵ پێشکەشکردنی
هاوکاریی دەروونی و کۆمەڵایەتی بۆ ڕزگاربووان.
داوا لە حکوومەتی فیدراڵی عێراق دەکەین ئەرکی
دەستووریی خۆی جێبەجێ بکات لە قەرەبووکردنەوەی دادپەروەرانەی کەسوکاری قوربانیان، گەڕانەوەی
ئاوارەکان بۆ سەر زێدی خۆیان بە سەربەرزی، و جێبەجێکردنی ڕێککەوتنی شنگال بۆ ئاساییکردنەوەی
دۆخی ناوچەکە و ئاوەدانکردنەوەی.
ستایشی هەنگاوەکانی پەرلەمان و وڵاتانی جیهان
دەکەین لە ناساندنی ئەم مەرگەساتە وەکو جینۆساید، و داواکارین هەوڵە نێودەوڵەتییەکان
چڕتر بکرێنەوە بۆ پاراستنی مافی پێکهاتەکان.
با لە دوازدەیەمین ساڵیادی ئەم کارەساتەدا،
هەموومان پێکەوە خەبات دژی هزری توندڕەوی و
توندوتیژیی دژی ژنان بكەین،و هەموو هەوڵەکانمان بخەینە گەڕ بۆ سارێژکردنی برینەکانی
خوشکە ئێزدییەکانمان.
درود بۆ گیانی پاکی سەرجەم شەهیدانی كوردستان
و قوربانیانی جینۆسایدی ئێزدییەکان سڵاو لە خۆڕاگریی ژنان و دایکانی سەربەرزی ئێزدی
فێدراسیۆنی ژنانی دیاسپۆرای كوردستانی ٣ی
ئابی ٢٠٢٦