فێدراسیۆنی ژنانی دیاسپۆرای کوردستانی لەگەڵ گەورەترین تۆڕی ڕێکخراوەکانی ژنان لە فینلاند کۆبووەوە

ئەمڕۆ ڕێكەوتی ١٧ی ٨ی ٢٠٢٦; شاندی فێدراسیۆنی ژنانی دیاسپۆرای کوردستانی، بە سەرۆکایەتیی شیرین زەکی جندی و دونیا خەلیل و بە بەشداریی ئەندامانی دەستەی بەڕێوەبەریی بەشی فینلاند، لە چوارچێوەی هەوڵە بەردەوامەکانیان بۆ گەیاندنی دەنگی ژنانی کورد و بەهێزکردنی پێگەیان لە کۆمەڵگەی نێودەوڵەتیدا، کۆبوونەوەیەکی ڕێکخراو و سەرکەوتوویان لەگەڵ بەڕێوەبەریی یەکێتیی ناوەندی ڕێکخراوەکانی ژنانی فینلاند (NJKL) ئەنجام دا.

یەکێتیی NJKL کە گەورەترین و دیارترین تۆڕی ڕێکخراوەکانی ژنان و یەکسانیی جێندەرییە لە فینلاند و سکاندیناڤیا و خاوەنی زیاتر لە ۱۱۰ ساڵ مێژووی خەبات و زیاتر لە ۷۰ ڕێکخراو و ٤٠٠ هزار ئەندامە، لەلایەن بەڕێوەبەری جێبەجێکار Aija Salo و تیمی بەڕێوەبەرییەوە پێشوازییەکی گەرمیان لە شاندی فێدراسیۆنی ژنان کرد.

لەم کۆبوونەوەیەدا کە کاتژمێر و نیوێکی خایاند و تێیدا Aija Salo، Annika Hinkkanen، Salla Kajanmaa و Maria Tolvanen ئامادە بوون، بە وردی باسی ڕەوشی ژنانی کوردستانی و ئاستەنگ و توانستەکانی کۆمەڵگەی کوردی لە فینلاند کرا؛ هاوکات شاندی فێدراسیۆنی ژنان ئامانج و نەخشەڕێگەی خۆیان خستەڕوو و بانگهێشتنامەیەكی فەرمییان ئاراستەی یەکێتیی NJKL کرد بۆ دروستکردنی هاوکاریی هاوبەش، جێبەجێکردنی پرۆژەی كەلتووری و کۆمەڵایەتی، و بەهێزکردنی داکۆکیکردن لە مافەکانی ژنان، کە ئەمەش وەک دەستکەوتێکی گرنگ دەرگایەکی نوێ لەبەردەم فێدراسیۆنەکەدا بۆ هاوکاریی دوورمەودا لە کۆمەڵگەی مەدەنیی فینلاندا دەكاتەوە.